Volvemos ver un novo tráiler da esperada segunda entrega de The Darkness, e se xa o anterior tráiler que nos mostraran era bastante violento, o que vos presento eleva isto á súa máxima expresión.

Todos aqueles que pasan a vida a criticar a violencia nos videoxogos están de parabéns, porque The Darkness 2 será como un carameliño para eles e dubido que o deixen fuxir.

A min polo de momento tanto me ten, gústame un protagonista que está apoiado por unhas serpes infernais, e con que sexa tan divertido que o anterior (sempre que falo deste xogo digo esta frase), estou máis que conforme.

Vede o tráiler e comentade a vosa impresión.

1- Decapitación de cabezas

2- Partir a unha persoa en dúas

3- Atravesar corpos

4- Cránios ao espeto

5- Sangue sen escatimar en gastos

6- Mais non vín ningunha invocación

Xa vedes, moito máis violento que a primeira excelente parte, mais non sei eu se estará á altura, e como xa dixen, as invocacións?, e o apartado técnico evolucionou tanto con respecto ao anterior?

A ver en que remata isto, pero quero ter fe nesta saga.

Voltamos cunha nova entrega de idioteces reais que acontecen polo mundo adiante. Desta volta viaxamos até a Suíza, onde unha asociacion policial, concretamente “The Swiss Christian Police Association” (a súa tradución xa non augura nada demasiado liberal, nin progresista) pretende censurar (e incluso prohibir) o videoxogo «The Darkness 2» porque hai escenas en que se dispara a policías.

“Xa se aconsellou a políticos, desenvolvedores e vendedores que ese tipo de xogos debían ser eliminados da circulación inmediatamente. […] Cando a policía na Inglaterra se converte en obxectivo de turbas agresivas, é importante que eses axentes non se vexan representados como o inimigo”.

O conto de nunca acabar, observan o videoxogo como o inimigo de calquera situación violenta, cando nos están a bombardear diaria e continuamente con imaxes de violencia corporal, violencia verbal, escenas de mortes e masacres.

E todo isto sen entrar en filmes para maiores de sete anos con execucións, asasinatos a sangue frío, pelexas… pero claro que non, isto non inflúe. Porén nun videoxogo é inadmisíbel. Que tristeza me produce.

Ah, a propósito, a 2K, compañía responsábel do videoxogo, respondeu este comunicado cunha soa frase:

“Os rumores de que mates polis no xogo son falsos. Non saen polis no xogo”.

Comezamos o día con entre malas noticias e as moi malas noticias, dependendo se xogaches á primeira entrega de The Darkness. Os que xogamos e desfrutamos como xabarín entre o millo do The Darkness sabemos que temos motivos para nos pórmos tristes, porque como consiga ser tan divertido como foi o seu predecesor, estaremos ante un grande lanzamento.

O título que estaba previsto para este outubro foi atrasado até 2012, concretamente no 10 de febreiro. 2K non mencionou os motivos aparentes pero podemos imaxinar que será polo de sempre, “puír detalles”.

A propósito, tamén se comeza a rumorear polas redes que poderá haber unha versión para a Wii U. Mais como xa dixen, polo de agora só son rumores.

A unha semaniña de que algúns privilixiados poidan probar este título no E3, os creadores queren manternos a ilusión no corpo e sacan á luz este tráiler con imaxes reais do propio xogo, e persoalmente gustoume o que vín.

E gustoume porque non perde o encanto da primeira entrega, como son os escenarios no metro, rúas molladas pola auga, tentáculos carnívoros… aínda que por outro lado, no vídeo aparecen partes en que a calidade gráfica diminúe, ou iso é o que me parece a min.

Tamén deixa patente que será unha entrega máis dura e violenta que o seu predecesor, pero é que cando a escuridade desata a súa forza, quen pode controlala?

Un dos xogos máis infravalorados desta xeración vai ter continuación, e moito máis pronto do que esperabamos.

Tendo en conta que non amosaron case nada de The Darkness 2 (só unhas poucas imaxes e o teaser que o tedes a continuación) nunca pensei telo nas tendas tan relativamente pronto.

Así, o 7 de outubro é o día escollido para que volvan renacer os seres da escuridade, e nós, podelos controlar ao noso antollo.

Aquí vedes o teaser no que non se nos ensina case nada, pero sérvenos para saber que o título está máis que vivo.

Alá polo inicio desta xeración apareceu un xogo que non se lle deu a importancia que merecía. Tiña como título The Darkness e poñíanos na pel dun protagonista con super poderes escuros, nos cales destacaba a posibilidade de controlar a uns seres do inframundo.

Inxustamente non acadou a fama que realmente merece un xogo destas características, cun apartado técnico impecable, unha xogabilidade moi boa e unha historia que enganchaba cousa mala.

Para aqueles que desfrutamos deste infravalorado título estamos de sorte porque acaban de confirmar a segunda entrega. Incluso deron unha data, na cal sitúa a súa saída neste mesmo outono.

Eu só espero que estea á altura do orixinal.