Hai sagas tolas e sagas serias, e se temos que mencionar algunhas sagas tolas, sen dúbida ente elas aparecería o nome de Serious Sam, e non me neguedes isto.

Pois a terceira entrega está a puntiño, a puntiño de volver a enganchar aos seus seguidores, mais os seus creadores botaron unha ollada a este mes, e coa inminente saída de Battlefield 3 e MW3, pensaron… “vai ser mellor que esperemos un chisco para sacar o noso xogo”.

Concretamente as palabras foron as seguintes:

Decidimos que o xogo necesita un mes extra de desenvolvemento. Daremos máis detalles, pero de momento pensamos que un mes máis de retoques e pulido é o que Serious Sam 3 merece, se realmente amamos e queremos que sexa un gran xogo.

Polo tanto, teremos que esperar ao 22 de novembro para probar esta terceira tolería de Sam. A ver se é tan bo xogo como dín…

Por se non o sabedes, o Kirby’s Epic Yarn non me agradou, non me agradou nada, e continúa sen me agradar por moi boas críticas que vexa pola rede. Tanto me ten, porque despois de ver o tráiler do próximo Kirby que vai chegar á Wii acougo un pouco. Kirby volta ás orixes mantendo as características que fixeron famosa a bóla rosa de Nintendo.

Até aquí nada novo, mais a nova escríboa porque se acaba de adiantar o seu día de lanzamento. Se ben nun principio estaba previsto para o Nadal, agora o Kirby’s Adventure poderémolo probar o 25 de novembro.

Para que vos fagades unha idea do que será, déixovos o tráiler que se mostrou no E3.

A polémica saga de condución Carmageddon podería volver ao mundo dos videoxogos grazas a conta atrás que sacaron na súa propia web.

A inesperada conta atrás remata o día 1 de xuño (xusto antes do E3), e polo que parece estariamos ante un inminente novo videoxogo de Carmageddon. Recordemos toda a polémica que captou esta saga polo feito de ter que conducir atropelando persoas,mentres que a súa cuarta entrega que ía ser sacada á luz no 2005 fora cancelada, pasando formar parte de Eidos.

Estaremos ante a definitiva volta de Carmageddon?, todo parece afirmar isto, mais tocará esperar uns días para asegurar todo.