Este ano que recén comeza virá, coma sempre, cheo a reventar de videoxogos, tanto para as máquinas de nova xeración coma para as da antiga, coma para PC, ou, polo que todo parece indicar, xa neste mesmo ano, Steam Machines. Neste artigo vou recoller, dun modo totalmente persoal, cales son os 15 xogos que eu máis agardo deste ano 2014, ordeados alfabéticamente.

 

1 – Alien Isolation (PC, PS3, PS4, Xbox 360, Xbox One)

Data de lanzamento: 4º trimestre de 2014.

Alien-Isolation-screen

Tralo sonado fracaso acadado por Aliens: Colonial Marines, SEGA tentará recuperar o prestixio perdido con esta nova entrega da franquicia Alien, nesta ocasión realizado por un dos estudos máis importantes da actualidade, Creative Assembly, creadores da famosa saga Total War.

Polo mostrado ata agora e polo comentado polos creadores, productores e responsábeis, o xogo virará da acción da saga Alien vs. Predator e Aliens: Colonial Marines cara o xénero do survival horror, achegándose deste modo ó filme orixinal. Para rematar esta volta atrás, a protagonista do xogo será Amanda Ripley, a filla da protagonista da saga cinematográfica, Ellen Ripley.

 

2 – Among the sleep (PC)

Data de lanzamento: Primaveira de 2014.

ats_wallpaper1440_900

Aló polo 2012 un xogo comezou a chamar a atención a nivel internacional polo seu protagonista principal: un neno de dous anos. Aínda que fíxose coñecido internacionalmente a partires de ahi, xa lograra premios e financiación por parte do goberno de Noruega, o país de orixe do estudo detrás deste xogo: Krillbite. Tralo nome que acadaron, lanzaron unha campaña en Kickstarter, que logrou acadar o seu obxectivo e que garante que sexa levado a bo porto.

Como xa se indicou, o xogo ponnos no corpo dun meniño de dous anos nunha casa na que comezan a ocorrer cousas e que, debido á curta idade do protagonista, a liña que diferenza sono de realidade vai diminuíndo o seu grosor. A maiores disto, o xogo terá compatibilidade co sistema de realidade virtual Oculus Rift, o que, trala fichaxe estrela de John Carmack, garante que o seu nivel (que calquera dos que o puidemos probar no seu momento opinamos que xa era alto) acadará un nivel superior.

 

3 – AR-K: Episodio 2 (PC, iOS, Android)

Data de lanzamento: Indeterminada

AR-K_02

Non tódolos días un videoxogo galego acada o seu obxectivo nunha prataforma coma Kickstarter, pero nesta ocasión así foi. A saga AR-K, desenvolta polo estudo coruñés Gato Salvaje, acadou a cantidade que pediran para ser quen de rematar os capítulos 3 e 4 da sua aventura gráfica episódica. Para levar a bo porto o seu proxecto, subíronse a bordo o escritor Greg Rucka, un recoñecido escritor de cómic norteamericano, e tamén incorporan a Ash Sroka, a muller que puxo a voz na triloxía Mass Effect a Tali’Zorah, para converterse na de Alicia, a protagonista da saga, na versión inglesa, xa que na versión en castelán, é interpretada por unha actriz galega, María Castro. Por certo, onte acadaron os votos necesarios para entrar en Steam a través da prataforma Greenlight.

 

 4 – Day Z (PC)

Data de lanzamento: Indeterminada

NoxHw

Si, o xogo xa está dispoñible en Steam. Si, en Memoria Pixelada xa falamos acerca do acceso a dita prataforma do xogo. Si, xa leva vendidas máis de 875.000 copias. Pero segue sendo un xogo en desenvolvemento. Agora mesmo accedeu a Steam (e logrou ser o xogo máis vendido nas ofertas, pese a non estar rebaixado) a través do su sistema Early Access, que permite que xogos en desenvolvemento sexan vendidos e logren o diñeiro necesario para acadar finalizarse. Actualmente o xogo está en versión alpha e espérase que entre en beta a finales de ano.

Non hai moito que dicir acerca del que non sexa xa coñecido: iniciou a moda actual dos xogos multixogador survival en primeira persoa (Infestation: survivor stories, Rust) baseados nun escenario postapocalíptico no que teremos que estar tan atentos ós enemigos do xogo coma, sobre todo, ó resto de persoas que se atopen xogando, xa que na meirande parte das veces, convértense na verdadeira amenaza. E todo iso o lograron simplemente cun mod do Arma II, agora prometen un xogo moito máis profundo ó tratarse dun título partindo de cero. A confianza de moita xente xa a teñen, e a miña entre ela.

 

5 – Diablo 3: Reaper of souls (PC, PS4)

Data de lanzamento: 25/03/2014

diablo-iii-reaper-of-souls-logo

Trala polémica e a decepción que supuxo, en parte, Diablo III no seu lanzamento, Blizzard trae esta primeira expansión do xogo, a cal inclúe un novo tipo de personaxe, o cruzado, aparte de, como é habitual, un acto a maiores dos que trae o xogo orixinal, para continuar a historia. Moitos somos os que recordamos a diferenza entre Diablo II e Diablo II máis a expansión, dun modo que non se pode concebir o xogo sen o contido adicional, debido ós profundos trocos que provocou na xogabilidade, de modo que Blizzard merécese un pouco de confianza de cara a mellorar a experiencia xogábel de Diablo III.

 

 6 – Evolve (PC, Xbox One, PS4)

Data de lanzamento: Outono de 2014

evolve

Probablemente se digo Tutle Rock Studios non acade a vosa atención, pero se troco esas verbas por Left 4 Dead pode que xa a teña. Evolve é o novo xogo deste estudo, que será publicado por 2K Games. Ata o de agora coñécense poucos datos acerca do xogo, aparte de ser un xogo multixogador. Pero o máis significativo do coñecido ata o momento é, sen dúbida, a sua proposta de xogo, na cal un equipo de 4 xogadores ten como obxectivo cazar ó monstruo que manexa o carto xogador.

 

7 – Game of Thrones

Data de lanzamento: indeterminada

article_post_width_news-game-of-thrones-telltale-rumor

Todos aquelas persoas que probaran The Walking Dead, o xogo de Telltale, entenderán a seguinte operación: Telltale +George  RR Martin + Game of Thrones. Non fai falla decir nada máis.

 

8 – Mario Kart 8 (Wii U)

Data de lanzamento: Primavera de 2014

TM_WiiU_MarioKart8

¿Qué podemos decir de Mario Kart que non sexa coñecido? Velocidade, risas, pasar un bo rato cos amigos e manexar ós teus personaxes favoritos unha vez máis subidos en karts, todo elo aderezado polos xa coñecidos powerups da saga. Teñen a fórmula do éxito, e saben aproveitala. Ó igual que todas as anteriores entregas, un must have.

 

9 – Mirror’s Edge 2 (PC, PS4, Xbox One)

Data de lanzamento: Indeterminada.

news_photo_29555_1370371972

Corría o ano 2008 cando en Xbox 360 e PS3 apareceu un xogo moi luminoso, rápido, cun mundo colorido, baseado en correr, saltar e empregar a axilidade da protagonista para chegar ata o seguinte edificio, saltando de tellado en tellado. O seu argumento, baseado en parte na novela de George Orwell 1984, era simple, ainda que adictivo, e o escenario, moi lineal, chamaba á exploración e a tentar escalar ata onde puidéramos para poder botar un ollo á cidade dende o punto máis alto do edificio máis alto. Mirror’s Edge 2 promete precisamente o que lle faltaba ó seu predecesor: un mundo aberto. Simplemente mantendo as cualidades da primeira entrega e engadindo este novo mundo aberto, o xogo dará un salto de calidade e convertirase nun dos máis rechamantes do ano sen dúbida de ningún tipo.

 

10- Rambo: The videogame (PC, PS3, Xbox 360)

Data de lanzamento: 21/02/2014

rambo2

Moita xente non estará dacordo co feito de que elixira este xogo por diante doutros para aparecer nesta lista dos máis agardados do ano, sendo un xogo que estou seguro de que non marcará un antes e un despois en ningún aspecto, e que seguramente estea cheo de erros. Pero pensade en que é de esperar que podamos facer cousas como estas. ¿Seguides pensando que o xogo non vai ser entretido? Eu non teño dúbida de ningún tipo, máis ainda tendo en conta que o xogo consistirá en superar esceas dos 3 primeiros filmes da saga.

 

11 – South Park: the stick of truth (PC, PS3, Xbox 360)

Data de lanzamento: 06/03/2014

South-Park-The-Stick-of-Truth-sí-será-lanzado-en-2013

Moitos medramos vendo na televisión ós polémicos debuxos South Park. Agora chegan cun dos xogos máis agardados do ano 2013, que tivo que ser desprazado a 2014 debido ós problemas económicos do seu distribuidor THQ. O xogo prometía no seu momento, e continúa prometendo agora mesmo, un xogo de rol no cal os creadores da serie teñen responsabilidade na elaboración do guión, cos personaxes míticos da serie (agardamos, coma non podía ser doutro modo, a morte de Kenny), será algo que moitos non queremos deixar pasar.

O xogo comeza xa antes do seu lanzamento a xerar a polémica esperada, xa que a Australia chegará unha versión censurada do mesmo. E seguramente non sexa o derradeiro mercado no que sofran recortes.

 

12 – Star Citizen (PC)

Data de lanzamento: Indeterminada

ObitalStation01

 

Atopámonos ante o xogo que ten o record de financiación a través de crowdfunding: ata o momento acadou un total de 37 millóns de dólares. A financiación arrancou coma un foguete en canto fíxose público que Chris Roberts, o creador da lexendaria saga Wing Commander, retornaba ó mundo dos videoxogos. E como era de esperar, retorna co que mellor sabe facer: un simulador de combate espacial. Ainda que nesta ocasión, o xogo vai moito máis alá dun xogo de simulación de combate, xa que trátase dun MMO cun mundo persistente e ca posibilidade de incluir mods. Como exemplo do interese que está a provocar, recentemente abriuse o sistema para crear clans, e en 12 horas creáronse máis de 4900 asociacións para xogar xuntos. O xogo ten toda a pinta de ser un dos máis importantes do próximo lustro, e apunta a ser unha dura competencia para o actual líder deste tipo de xogos, o World of Warcraft.

 

13 – The Walking Dead: Season Two (PC, PS3, Xbox 360, Vita, iOS)

Data de lanzamento: 17/12/2013

WDS2_KeyArt_1920x1080_NoLogo_large_verge_medium_landscape

Estamos ante a secuela dun dos xogos máis sorprendentes dos derradeiros anos, e que supuso a consagración do seu estudo creador, Telltale, e que confirma o troco da aventura gráfica clásica, con puzles cunha dificultade elevada a un novo modelo de aventura gráfica, centrada ó 100% na historia e nos personaxes. Precisamente un dos personaxes desta primeira entrega da saga é a protagonista desta segunda parte, a nena Clementine, seguramente a personaxe favorita da meirande parte dos que xogaron esa primeira parte.

O xogo é certo que foi publicado en Decembro de 2013, pero é unha aventura episódica que terá todos os seus episodios excepto ese primeiro publicados en 2014. E se continúa ca calidade do seu predecesor, non descarto para nada que estea pelexando de novo polo GOTY.

 

14 – The Witcher 3: Wild Hunt (PC, PS4, Xbox One)

Data de publicación: Indeterminada.

420

Máximo favorito ó GOTY 2014, e ainda non se viron máis que unhas poucas imaxes e algún vídeo. Non fai falla máis. Se The Witcher 2 foi un dos mellores xogos da xeración pasada, esta terceira parte da saga apunta a mellorar ó seu predecesor, incluindo a principal carenza do xogo anterior, a falta dun mundo totalmente aberto no que poder perderse.

É de esperar que, do mesmo modo que o seu predecesor, marque un hito no tocante ó aspecto técnico (CD Projekt Red descartou realizar o xogo para PS3 e Xbox 360 pola imposibilidade de que funcionara neses sistemas), a nivel historia é de supor tamén que será tan sobresaínte como o Assassins of Kings e, sobre todo, contará cun dos, se non o mellor, personaxe da xeración anterior, o lobo branco, Geralt de Rivia.

Agardaremos impacientes a publicación da data definitiva de saída ó mercado, porque de seguro valerá a pena a espera e ata o derradeiro céntimo que custe.

 

15 – Uncharted 4 (PS4)

Data de publicación: Indeterminada

2498622-nathan_drake

 

Se na posición 14 falábamos dun dos mellores personaxes da xeración, neste derradeiro xogo estamos a falar doutro dos grandes, Nathan Drake, o protagonista da saga Uncharted.

O desenvolvemento desta cuarta entrega da saga, a primeira nas consolas de nova xeración leva rumoreándose dende inicios de 2013, pero leve un ano en desenvolvemento o xogo ou non, unha cousa está clara: será, ó igual que todos os anteriores xogos da saga e o derradeiro xogo dos seus creadores, Naughty Dog, técnicamente rompedor no momento da sua saída. O fixeron co Uncharted 2, superando todo o visto ata entonces en PS3, o melloraron un pouquiño máis en Uncharted 3 (ainda que como xogo é peor que o 2, técnicamente é lixeiramente superior) e remataron de romper con todo co The Last of Us, marcando un tope técnico en PS3 que seguramente non sexa superado. Esta cuarta entrega será peliculeira, palomiteira totalmente, de consumo lixeiro, ó igual cas 3 anteriores, pero seguro que igual de entretida e adictiva.

A nova IP de Bioware atópase nunha fase xogábel

Por: Martes, 24 de Decembro de 2013, 15:38 COMENTAR

BiowareSpikeTV

Dende fai un tempo sabemos que Bioware traballa nunha nova entrega de Mass Effect (si,despois de todo o batifundio provocado polo polémico final da triloxía), pois grazas a Casey Hudson, productor executivo desta serie asegurou que xa está nun estado suficientemente avanzado como para xogalo.

Non só iso, senón que tamén están a traballar nunha IP completamente nova, da que tamén asegura que está nunha fase de creación moi avanzada.

Nun primeiro momento podemos supoñer que se trate dunha entrega de Star Wars, mais o feito de que sexa unha IP completamente nova fainos descartar esta posibilidade.

Agardaremos máis novas sobre estes proxetos, porque se Bioware foi un dos estudos a resaltar na actual/anterior xeración, nos anos próximos promete seguir dando que falar.

O troco xeracional

Por: Martes, 17 de Decembro de 2013, 12:00 1 COMENTARIO

the-last-of-us-03

Nestes intres atopámonos nos albores da chamada “nova xeración” de consolas, dividida en 3 máquinas: Nintendo Wii U, Microsoft Xbox One e Sony Playstation 4. Este troco xeracional está en boca de todo o mundo, a xente bótase a comprar estas novas consolas nas tendas especializadas ou non tan especializadas, as distribuidoras anuncian os novos xogos que sairán no próximo ano 2014, os estudos de desenvolvemento están traballando para habituarse ao funcionamento destas consolas e exprimirlles ata a derradeira gota de rendemento e estamos no principio dun proceso de saturación publicitaria nos medios maioritarios de comunicación de cara a convencernos a todos das bondades da nova xeración e as melloras que traerá en contraste ca anterior.

Sen dúbida entre estas melloras atoparémonos cun novo surtido de filtros, texturas de alta resolución, escenarios moito máis grandes que na actual e un sinfín de novos efectos, reflexos en cristais e a auga máis realista vista xamáis nunha consola de sobremesa. Pero o meirande troco, o troco que marca realmente un cambio de xeración, xa tivo lugar. E tivo lugar sen que nos déramos conta.

Neste troco temos 3 puntos de vital importancia, que compoñen súa particular trinidade. Un tuvo lugar no ano 2010, o outro no 2011 e o derradeiro neste mesmo 2013, a mediados de ano, para ser máis precisos.

Os trocos típicos na industria do videoxogo tiñan lugar por motivos total ou case totalmente técnicos, do modo que o fixo Doom no lonxano 1993, ou do modo no que as diferentes xeracións de consolas van aparecendo co paso do tempo e proporcionan novas posibilidades para os programadores de facer mellores e máis impresionantes xogos. O troco do que vou falar non ten nada que ver cun apartado técnico, senón que é moito máis sutil, pero que ten a mesma ou incluso máis importancia que calquera mellora técnica.

Para poder entender o troco, hai que porse en situación e retroceder ata ese ano 2010. GTA 4 acumulaba críticas positivas alí onde fora analizado, pero non deixaba de ser un GTA, cas típicas cousas que facer nun xogo da saga. Uncharted e sobre todo Uncharted 2 levaran o escalón gráfico na PS3 ao seguinte nivel, Mass Effect acababa de presentar a súa segunda parte, os rumores acerca de Skyrim comenzaban a ser xa imparables e o boom dos xogos indies estaba iniciándose tralo lanzamento de Braid e a inminente chegada de Limbo.

heavy-rain-21

Nese contexto aparece a finales de Febreiro de 2010 o xogo que conforma o primeiro piar do troco, Heavy Rain.
5 anos despois do seu anterior xogo, o aclamado Fahrenheit, a empresa francesa Quantic Dream lanza este xogo, que borra dun plumazo a separación entre videoxogos e cine ao proporcionar unha experiencia prácticamente cinematográfica, cunha historia complexa, múltiples opcións ao longo da historia e pondo de moda o tan empregado actualmente recurso dos QTE para realizar a interacción entre persoa e xogo. Pero non é este o troco ao que nos ocupa, senón que este ven dado pola propia historia en si mesma, unha historia que Microsoft rechazou engadir ao catálogo da súa Xbox 360 e que provocou que Heavy Rain se convertira nun exclusivo de Playstation 3. Así pois, esta negativa de Microsoft a permitir a publicación na 360 dun xogo no que o argumento xira en torno ao asasinato de nenos e que ponlle en bandexa de prata á competencia un xogo que resultou ser un auténtico vendedor de consolas, xa forma, merecidamente, parte da historia dos videoxogos.

The-Witcher-2-Assassins-of-Kings-PC-2

Únicamente un ano despois de este xogo, aparece outro, o segundo dunha saga baseada nos libros de Geralt de Rivia, escritos por Andrzej Sapkowski e feito por un pequeno estudo polaco chamado CD Projekt RED. Este xogo, aclamado internacionalmente dende o momento do seu lanzamento pola súa combinación de historia, xogabilidade e apartado técnico, foi publicado baixo o nome The Witcher 2: Assassins of kings. A pesares de que técnicamente a súa calidade máxima co filtro hiperrealista activado é motivo máis que dabondo para marcar un hito técnico no momento (non en vano é seguramente un dos mellores xogos técnicamente falando da xeración xunto co Crysis e ainda hoxe en día non son poucos precisamente as computadoras capaces de movelo fluidamente con dito filtro activado), o punto máis destacado do xogo é, sen dúbida, a súa historia. Unha historia complexa e apaixoante, que atrapa ao xogador ate o mesmo final e que toca de modo bastante explícito un tema que non é moi común no mundillo, e menos tratado ca seriedade mostrada en The Witcher 2, coma é o tema do sexo. Si, todos xogamos a algún Larry e todos coñecemos os métodos de recuperar vida dos GTA, pero unha cousa é iso, e outra moi diferente é tratar o sexo do modo que se trata neste xogo, dun modo adulto e sen tapuxos. Non vou por aquí ningún vídeo, xa que sería spoilear a historia, pero unha busca rápida polo Internet permitiravos comprobalo.

The-Last-of-US-PC-game_1920x1080

De este modo, chegamos ao terceiro e derradeiro xogo, publicado neste mesmo 2013, trepou ao momento ate as posicións máis elevadas na maioría de rankings xa non só dos mellores xogos do ano, nen sequera nos dos mellores xogos da súa plataforma, senón que xa directamente entrou nos dos mellores xogos da xeración. Seguramente con estes datos xa saberedes de qué xogo estouvos a falar, pero se vos digo que os protagonistas son un home atormentado e unha nena, xa quedan disipadas as dudas. Falo, efectivamente, de The Last of Us.
Cando todo indicaba que a PS3 alcanzara o seu tope gráfico con Uncharted 2 e 3, o mesmo estudo de desenvolvemento, o xa histórico Naughty Dog, saca este xogo que, lonxe de ser un Uncharted máis, é moito máis, xa non polo seu formidable apartado técnico, apartado que está xa non entre os mellores de PS3, se non que seguramente sexa o tope técnico da presente xeración de consolas. O igual que no caso de The Witcher 2, a pesares deste formidable apartado técnico, o máis destacado non é iso, senón que é a historia, sendo máis concretos neste caso, o desenvolvemento dos persoaxes, que acadan unha simbiose que queda patente no seu final, que poderá ser máis ou menos criticado, pero que xa é parte da historia dos videoxogos.

Así pois, estes 3 piares conforman o troco xeracional ao que me refería anteriormente: o troco dunha época na que os videoxogos eran un elemento de divertimento, pero nada máis a unha época na que os videoxogos son un modo de entretemento adulto, maduro, complexo, e no que cada vez vai haber menos temas tabús.

Non é casualidade que estes 3 xogos foran considerados entre os mellores da presente xeración, e non é casualidade que foran os elexidos para este artigo. O salto dado por Heavy Rain involucrando ao xogador nunha película interactiva, cunha historia moi dura, cun tema que fai 10 anos sería imposible de tratar nun videoxogo sen que se che botaran ao pescozo, e un xiro final do guión espectacular, que converte os últimos intres de xogo nunha contrarreloxo na que chegas a sentirte realmente agobiado pola situación e a complexidade argumental de The Witcher 2, teñen o seu cumio na historia de The Last of Us. Un xogo violentísimo, escuro como o que máis, no que daste conta de que as accións que cres axeitadas no momento provocan un dano no que non repararas e no que os persoaxes evolucionan ante os teus ollos ao máis puro estilo dunha película, e que ademáis ese xogo teña as críticas tan positivas que ten, deixan de manifesto que algo trocou no mundo dos videoxogos.

Os videoxogos xa saltaron á seguinte xeración, o troco empezou fai xa casi 4 anos e pasou inadvertido para a meirande parte da xente, pero xa non vai ir a ningún lado.

«Minecraft-Mass Effect»

Por: Luns, 2 de Setembro de 2013, 10:00 COMENTAR

minecraft-mass-effect
Segundo anunciou 4J Studios a versión para Xbox 360 do exitoso videoxogo de Mojang, Minecraft, terá un DLC exclusivo coa temática do videoxogo Mass Effect 3.

Este novo DLC incluirá 36 novos skins para os personaxes, 22 pistas de música da banda sonora orixinal do Mass Effect 3 e novos menús e interface.

Estará dispoñible o vindeiro 4 de setembro.

Kirby Effect

Por: Luns, 2 de Setembro de 2013, 9:00 COMENTAR

kirby-effect

Sería unha mezcla interesante…

Vía | Imgur.com

Mass Effect 4 vai vento en popa.

Por: Xoves, 18 de Xullo de 2013, 11:21 COMENTAR

200

Algúns dos mais importantes membros do estudio de Bioware, Ken Thain e Mike Gamble, mantiveron unha interesante conversación en Twitter onde podemos sonsacar que o desenvolvemento de Mass Effect 4 vai según o previsto.

Unha nova historia de Mass Effect e un personaje principal estiveron sometidos a estudo hoxe. Esta merda e real. Creo que os fans estarán abraiados de xogar esta historia“, declarou Thain.

Hoxe déronse importantes reunións para debatir os avances de Mass Effect. As cousas avanzan ben. E xenial estar involucrado neste universo outra vez“, dixo, pola sua parte, Gamble.

Recordemos que fai uns días Yannick Roy, o director de Bioware Montreal, fixera unhas declaracións sobre o enfoque novo da saga. O tratarse de unha nova historia cun novo protagonista, o xogo apostará por asemellarse máis os orixes da franquicia que seguir na evolución do xénero shooter como ben pasou có terceiro título, contentando así tanto os fans clásicos coma os novos xogadores que decidan incorporarse as filas deste maravilloso universo.

Mass of FallOut

Por: Sábado, 13 de Xullo de 2013, 9:00 COMENTAR

mass-of-fallout

Sería unha mezcla de videoxogos interesante…

Vía | Imgur.com

“Agora definiremos o que é a boa ciencia ficción. A desfiguración conceptual (a idea nova, en outras palabras) debe ser autenticamente nova, ou unha nova variación sobre outra anterior, e ten que estimular o intelecto do lector; ten que invadir a súa mente e abrila á posibilidade de algo que até entón non imaxinara”
Philip K Dick

Boa ciencia ficción; que difícil de definir!. Até o mestre Philip K Dick expresouno en verbas ambiguas e pouco concretas.

Non existe, é certo, un esquema métrico para valorar a calidade das cosmoloxías que nos chegaron a través de diferentes medios (cine ou literatura, fundamentalmente) durante as últimas décadas –ou séculos-; aínda por mais que os vacilantes canons culturais de cada momento intentasen poñelas sobre unha gráfica cualitativa inmutábel que obviamente non fixo outra cousa que moverse.

Non podemos, e para min é obvio, definir grados cualitativos globais e universalmente aceptados da calidade de cada unha destas obras, pero si podemos, coma ben sinalaba o señor Dick, recoñecer a existencia de algo como é “a boa ciencia ficción”. Mais en que se concreta iso?.
Ler o resto da entrada »

Así o dixo Casey Hudson, creativo do videoxogo, porque ten ben claro que de seguir explotando e alongando esta historia o argumento remataría resentíndose, así que Mass Effect 3 será o fin dunha das mellores triloxías desta xeración.

Con isto, Bioware asegurou que Shepard terá un épico final e que non deixará cabos soltos para que non se permita a súa continuación.

Pero de verdade pensades que non haberá máis capítulos de Mass Effect?, a min cústame crelo e máis tendo en conta as súas ventas, pero se isto acontece presumiblemente serán precuelas ou historias paralelas a que xa coñecemos.

Personalmente gústame esta decisión, e máis sabendo que o argumento de Mass Effect é un factor importantísimo na saga, e sempre hai que saber cando parar e deixar o listón ben alto. Bioware conseguíuno e alcanzou niveis que moitos outros títulos desexarían, agora só falta ver como remata esta triloxía, e para iso teremos que seguir contando os días até o 6 de marzo.

Dun tempo para acá vénse falando da adaptación da xenial saga Mass Effect á grande pantalla. E volvín sentir o mesmo que cando sacan estas adaptacións, entre curiosidade e mágoa.

Se ben somos todos moi conscientes de que ben poucos filmes baseados en videoxogos superan o aprobado, neste caso quero dar unha mínima oportunidade a este filme. Por que? Pois porque estará baseado no primeiro videoxogo, título onde recae a inmensidade do argumento, polo que neste caso non poden dicir que non teñen un argumento decente para realizar este proxecto. Se o estragan é culpa dos que están a desenvolver este proxecto, como sempre. E diría máis, mesmo hai diálogos que os poden exportar directamente do propio videoxogo, porque se recordades había diálogos verdadeiramente bos.

Pois esta noticia nace cando nos informan que o propio filme estará presente na Comic Com (do 21 ao 24 de xullo), na cal estarán o encargado do guión Mark Protosevich e o responsábel de Bioware Casey Hudson.

Como terminará este filme? Estará á altura da saga intergaláctica? Terá o suficiente éxito como para se atreveren coas seguintes entregas?

Xenial fanart de Mass Effect

Por: Luns, 28 de Febreiro de 2011, 7:42 COMENTAR

Cando as cousas se fan ben, o resultado nótase. Dentro das cousas ben feitas podemos meter as creacións deste fan de Mass Effect que creou uns artworks do máis acolledores.

Impresionantes, sen dúbida. Se non me credes fixádeos nesta Amanda.

Por certo, neste enlace atoparedes toda a coleción de artworks que deberiades ver, porque non teñen desperdicio ningún.

Cosplay de Jack

Por: Luns, 30 de Agosto de 2010, 18:46 COMENTAR

Xa fai tempo que non poño ningún cosplay na páxina e cando atopei esta non me din resisitido a amosárvola.

Nada máis e nada menos que un cosplay da personaxe máis extravagante ( se se pode elexir a un ), do excelente Mass Effect 2. Jack, está aquí.

jack cosplay