1c31c6d1970da9f5958776c72ee77cf9_original

Hai unhas poucas horas finalizou o crowdfunding na plataforma kickstarter do novo xogo de Hifumi Kono, creador da serie de xogos Clock Tower. Baixo o estudio Playism Games presentan un  novo survival horror que creceu baixo o nome de Project Scissors. Non falaremos neste caso dunha financiación de cifras históricas como as temos vistas con outros títulos, pero sobroulle case un día para acadar os 300.000 $ que pediran, chegando á hora do seu peche a 314.771 $ unha cifra que de seguro axudará ó estudo a achegarnos esta peza que xa está a erguer as expectativas de moitos fans que atopáronse de novas con esta proposta.Unha mágoa que non se acadase ningún dos obxectivos que se estableceron por riba do límite de financiación como eran unha maior diversidade de mortes, un personaxe engadido, ou as versions de PS4 e XBoxOne.

O certo e que lle falta traballo por diante o estudio xaponés, pero xa nestas primeiras imaxes de gameplay pódese ver que a súa promesa de condensar a esencia das películas de terror xaponesas estase a cumprir e fainos pensar ata onde poderán chegar se fan un bo traballo.

Quedamos a espera e vos deixamos a páxina de kickstarter e a web do estudio para que podades seguir o seu futuro.

Playism Games

Kickstarter do proxecto

nextcargame
O pasado 16 de xaneiro publicábase, dentro do programa Early Access de Steam, unha primeira versión do xogo de destrución de coches «Next Car Game» (título provisional). Nos quince días que leva dispoñible, xa conseguíu recadar máis de 1 millón de dólares, o que supón un éxito para o estudo Bugbear Entertainment.

“Isto é un incríble éxito para un xogo de coches, especialmente, considerando o difícil camiño ao éxito.”

“Ao longo do camiño, enviámoslle o xogo a numerosas compañías coa esperanza de que o xogo acabaría sendo publicado. Desafortunadamente, recibimos a mesma resposta unha e outra vez: non había mercado para un xogo como o noso. Vamos, quen ía querer correr e destruir coches como nos xogos antigos?”

O pasado mes de novembro, Bugbear cancelaba a súa campaña de financiación en Kickstarter, ao recadar pouco máis de 81.000 dólares dos 350.000 que tiñan como obxectivo, polo que o programa Steam Early Access foi unha boa opción para publicar o xogo.

Está dispoñible en Steam Early Access dende 23,99 €.

Este ano que recén comeza virá, coma sempre, cheo a reventar de videoxogos, tanto para as máquinas de nova xeración coma para as da antiga, coma para PC, ou, polo que todo parece indicar, xa neste mesmo ano, Steam Machines. Neste artigo vou recoller, dun modo totalmente persoal, cales son os 15 xogos que eu máis agardo deste ano 2014, ordeados alfabéticamente.

 

1 – Alien Isolation (PC, PS3, PS4, Xbox 360, Xbox One)

Data de lanzamento: 4º trimestre de 2014.

Alien-Isolation-screen

Tralo sonado fracaso acadado por Aliens: Colonial Marines, SEGA tentará recuperar o prestixio perdido con esta nova entrega da franquicia Alien, nesta ocasión realizado por un dos estudos máis importantes da actualidade, Creative Assembly, creadores da famosa saga Total War.

Polo mostrado ata agora e polo comentado polos creadores, productores e responsábeis, o xogo virará da acción da saga Alien vs. Predator e Aliens: Colonial Marines cara o xénero do survival horror, achegándose deste modo ó filme orixinal. Para rematar esta volta atrás, a protagonista do xogo será Amanda Ripley, a filla da protagonista da saga cinematográfica, Ellen Ripley.

 

2 – Among the sleep (PC)

Data de lanzamento: Primaveira de 2014.

ats_wallpaper1440_900

Aló polo 2012 un xogo comezou a chamar a atención a nivel internacional polo seu protagonista principal: un neno de dous anos. Aínda que fíxose coñecido internacionalmente a partires de ahi, xa lograra premios e financiación por parte do goberno de Noruega, o país de orixe do estudo detrás deste xogo: Krillbite. Tralo nome que acadaron, lanzaron unha campaña en Kickstarter, que logrou acadar o seu obxectivo e que garante que sexa levado a bo porto.

Como xa se indicou, o xogo ponnos no corpo dun meniño de dous anos nunha casa na que comezan a ocorrer cousas e que, debido á curta idade do protagonista, a liña que diferenza sono de realidade vai diminuíndo o seu grosor. A maiores disto, o xogo terá compatibilidade co sistema de realidade virtual Oculus Rift, o que, trala fichaxe estrela de John Carmack, garante que o seu nivel (que calquera dos que o puidemos probar no seu momento opinamos que xa era alto) acadará un nivel superior.

 

3 – AR-K: Episodio 2 (PC, iOS, Android)

Data de lanzamento: Indeterminada

AR-K_02

Non tódolos días un videoxogo galego acada o seu obxectivo nunha prataforma coma Kickstarter, pero nesta ocasión así foi. A saga AR-K, desenvolta polo estudo coruñés Gato Salvaje, acadou a cantidade que pediran para ser quen de rematar os capítulos 3 e 4 da sua aventura gráfica episódica. Para levar a bo porto o seu proxecto, subíronse a bordo o escritor Greg Rucka, un recoñecido escritor de cómic norteamericano, e tamén incorporan a Ash Sroka, a muller que puxo a voz na triloxía Mass Effect a Tali’Zorah, para converterse na de Alicia, a protagonista da saga, na versión inglesa, xa que na versión en castelán, é interpretada por unha actriz galega, María Castro. Por certo, onte acadaron os votos necesarios para entrar en Steam a través da prataforma Greenlight.

 

 4 – Day Z (PC)

Data de lanzamento: Indeterminada

NoxHw

Si, o xogo xa está dispoñible en Steam. Si, en Memoria Pixelada xa falamos acerca do acceso a dita prataforma do xogo. Si, xa leva vendidas máis de 875.000 copias. Pero segue sendo un xogo en desenvolvemento. Agora mesmo accedeu a Steam (e logrou ser o xogo máis vendido nas ofertas, pese a non estar rebaixado) a través do su sistema Early Access, que permite que xogos en desenvolvemento sexan vendidos e logren o diñeiro necesario para acadar finalizarse. Actualmente o xogo está en versión alpha e espérase que entre en beta a finales de ano.

Non hai moito que dicir acerca del que non sexa xa coñecido: iniciou a moda actual dos xogos multixogador survival en primeira persoa (Infestation: survivor stories, Rust) baseados nun escenario postapocalíptico no que teremos que estar tan atentos ós enemigos do xogo coma, sobre todo, ó resto de persoas que se atopen xogando, xa que na meirande parte das veces, convértense na verdadeira amenaza. E todo iso o lograron simplemente cun mod do Arma II, agora prometen un xogo moito máis profundo ó tratarse dun título partindo de cero. A confianza de moita xente xa a teñen, e a miña entre ela.

 

5 – Diablo 3: Reaper of souls (PC, PS4)

Data de lanzamento: 25/03/2014

diablo-iii-reaper-of-souls-logo

Trala polémica e a decepción que supuxo, en parte, Diablo III no seu lanzamento, Blizzard trae esta primeira expansión do xogo, a cal inclúe un novo tipo de personaxe, o cruzado, aparte de, como é habitual, un acto a maiores dos que trae o xogo orixinal, para continuar a historia. Moitos somos os que recordamos a diferenza entre Diablo II e Diablo II máis a expansión, dun modo que non se pode concebir o xogo sen o contido adicional, debido ós profundos trocos que provocou na xogabilidade, de modo que Blizzard merécese un pouco de confianza de cara a mellorar a experiencia xogábel de Diablo III.

 

 6 – Evolve (PC, Xbox One, PS4)

Data de lanzamento: Outono de 2014

evolve

Probablemente se digo Tutle Rock Studios non acade a vosa atención, pero se troco esas verbas por Left 4 Dead pode que xa a teña. Evolve é o novo xogo deste estudo, que será publicado por 2K Games. Ata o de agora coñécense poucos datos acerca do xogo, aparte de ser un xogo multixogador. Pero o máis significativo do coñecido ata o momento é, sen dúbida, a sua proposta de xogo, na cal un equipo de 4 xogadores ten como obxectivo cazar ó monstruo que manexa o carto xogador.

 

7 – Game of Thrones

Data de lanzamento: indeterminada

article_post_width_news-game-of-thrones-telltale-rumor

Todos aquelas persoas que probaran The Walking Dead, o xogo de Telltale, entenderán a seguinte operación: Telltale +George  RR Martin + Game of Thrones. Non fai falla decir nada máis.

 

8 – Mario Kart 8 (Wii U)

Data de lanzamento: Primavera de 2014

TM_WiiU_MarioKart8

¿Qué podemos decir de Mario Kart que non sexa coñecido? Velocidade, risas, pasar un bo rato cos amigos e manexar ós teus personaxes favoritos unha vez máis subidos en karts, todo elo aderezado polos xa coñecidos powerups da saga. Teñen a fórmula do éxito, e saben aproveitala. Ó igual que todas as anteriores entregas, un must have.

 

9 – Mirror’s Edge 2 (PC, PS4, Xbox One)

Data de lanzamento: Indeterminada.

news_photo_29555_1370371972

Corría o ano 2008 cando en Xbox 360 e PS3 apareceu un xogo moi luminoso, rápido, cun mundo colorido, baseado en correr, saltar e empregar a axilidade da protagonista para chegar ata o seguinte edificio, saltando de tellado en tellado. O seu argumento, baseado en parte na novela de George Orwell 1984, era simple, ainda que adictivo, e o escenario, moi lineal, chamaba á exploración e a tentar escalar ata onde puidéramos para poder botar un ollo á cidade dende o punto máis alto do edificio máis alto. Mirror’s Edge 2 promete precisamente o que lle faltaba ó seu predecesor: un mundo aberto. Simplemente mantendo as cualidades da primeira entrega e engadindo este novo mundo aberto, o xogo dará un salto de calidade e convertirase nun dos máis rechamantes do ano sen dúbida de ningún tipo.

 

10- Rambo: The videogame (PC, PS3, Xbox 360)

Data de lanzamento: 21/02/2014

rambo2

Moita xente non estará dacordo co feito de que elixira este xogo por diante doutros para aparecer nesta lista dos máis agardados do ano, sendo un xogo que estou seguro de que non marcará un antes e un despois en ningún aspecto, e que seguramente estea cheo de erros. Pero pensade en que é de esperar que podamos facer cousas como estas. ¿Seguides pensando que o xogo non vai ser entretido? Eu non teño dúbida de ningún tipo, máis ainda tendo en conta que o xogo consistirá en superar esceas dos 3 primeiros filmes da saga.

 

11 – South Park: the stick of truth (PC, PS3, Xbox 360)

Data de lanzamento: 06/03/2014

South-Park-The-Stick-of-Truth-sí-será-lanzado-en-2013

Moitos medramos vendo na televisión ós polémicos debuxos South Park. Agora chegan cun dos xogos máis agardados do ano 2013, que tivo que ser desprazado a 2014 debido ós problemas económicos do seu distribuidor THQ. O xogo prometía no seu momento, e continúa prometendo agora mesmo, un xogo de rol no cal os creadores da serie teñen responsabilidade na elaboración do guión, cos personaxes míticos da serie (agardamos, coma non podía ser doutro modo, a morte de Kenny), será algo que moitos non queremos deixar pasar.

O xogo comeza xa antes do seu lanzamento a xerar a polémica esperada, xa que a Australia chegará unha versión censurada do mesmo. E seguramente non sexa o derradeiro mercado no que sofran recortes.

 

12 – Star Citizen (PC)

Data de lanzamento: Indeterminada

ObitalStation01

 

Atopámonos ante o xogo que ten o record de financiación a través de crowdfunding: ata o momento acadou un total de 37 millóns de dólares. A financiación arrancou coma un foguete en canto fíxose público que Chris Roberts, o creador da lexendaria saga Wing Commander, retornaba ó mundo dos videoxogos. E como era de esperar, retorna co que mellor sabe facer: un simulador de combate espacial. Ainda que nesta ocasión, o xogo vai moito máis alá dun xogo de simulación de combate, xa que trátase dun MMO cun mundo persistente e ca posibilidade de incluir mods. Como exemplo do interese que está a provocar, recentemente abriuse o sistema para crear clans, e en 12 horas creáronse máis de 4900 asociacións para xogar xuntos. O xogo ten toda a pinta de ser un dos máis importantes do próximo lustro, e apunta a ser unha dura competencia para o actual líder deste tipo de xogos, o World of Warcraft.

 

13 – The Walking Dead: Season Two (PC, PS3, Xbox 360, Vita, iOS)

Data de lanzamento: 17/12/2013

WDS2_KeyArt_1920x1080_NoLogo_large_verge_medium_landscape

Estamos ante a secuela dun dos xogos máis sorprendentes dos derradeiros anos, e que supuso a consagración do seu estudo creador, Telltale, e que confirma o troco da aventura gráfica clásica, con puzles cunha dificultade elevada a un novo modelo de aventura gráfica, centrada ó 100% na historia e nos personaxes. Precisamente un dos personaxes desta primeira entrega da saga é a protagonista desta segunda parte, a nena Clementine, seguramente a personaxe favorita da meirande parte dos que xogaron esa primeira parte.

O xogo é certo que foi publicado en Decembro de 2013, pero é unha aventura episódica que terá todos os seus episodios excepto ese primeiro publicados en 2014. E se continúa ca calidade do seu predecesor, non descarto para nada que estea pelexando de novo polo GOTY.

 

14 – The Witcher 3: Wild Hunt (PC, PS4, Xbox One)

Data de publicación: Indeterminada.

420

Máximo favorito ó GOTY 2014, e ainda non se viron máis que unhas poucas imaxes e algún vídeo. Non fai falla máis. Se The Witcher 2 foi un dos mellores xogos da xeración pasada, esta terceira parte da saga apunta a mellorar ó seu predecesor, incluindo a principal carenza do xogo anterior, a falta dun mundo totalmente aberto no que poder perderse.

É de esperar que, do mesmo modo que o seu predecesor, marque un hito no tocante ó aspecto técnico (CD Projekt Red descartou realizar o xogo para PS3 e Xbox 360 pola imposibilidade de que funcionara neses sistemas), a nivel historia é de supor tamén que será tan sobresaínte como o Assassins of Kings e, sobre todo, contará cun dos, se non o mellor, personaxe da xeración anterior, o lobo branco, Geralt de Rivia.

Agardaremos impacientes a publicación da data definitiva de saída ó mercado, porque de seguro valerá a pena a espera e ata o derradeiro céntimo que custe.

 

15 – Uncharted 4 (PS4)

Data de publicación: Indeterminada

2498622-nathan_drake

 

Se na posición 14 falábamos dun dos mellores personaxes da xeración, neste derradeiro xogo estamos a falar doutro dos grandes, Nathan Drake, o protagonista da saga Uncharted.

O desenvolvemento desta cuarta entrega da saga, a primeira nas consolas de nova xeración leva rumoreándose dende inicios de 2013, pero leve un ano en desenvolvemento o xogo ou non, unha cousa está clara: será, ó igual que todos os anteriores xogos da saga e o derradeiro xogo dos seus creadores, Naughty Dog, técnicamente rompedor no momento da sua saída. O fixeron co Uncharted 2, superando todo o visto ata entonces en PS3, o melloraron un pouquiño máis en Uncharted 3 (ainda que como xogo é peor que o 2, técnicamente é lixeiramente superior) e remataron de romper con todo co The Last of Us, marcando un tope técnico en PS3 que seguramente non sexa superado. Esta cuarta entrega será peliculeira, palomiteira totalmente, de consumo lixeiro, ó igual cas 3 anteriores, pero seguro que igual de entretida e adictiva.

the-banner-saga
A compañía King, creadora do popular «Candy Crush Saga» e similares, presentou unha demanda contra o estudo Stoic, polo título do seu novo xogo «The Banner Saga».

Segundo King, o título “The Banner Saga” moi similar aos seus e pode provocar confusión e erros, o que pode provocar danos á súa marca.

Dende o estudo Stoic comentaron:

“Non imos facer unha saga viquinga sen a palabra “Saga” e non lle temos aprecio a calquera que nolo queira impedir.”

“King.com di que non están tentando impedirnos usar “The Banner Saga”, pero a súa oposición legal contra o noso rexistro da marca permanece. Estamos encantados coas mostras de apoio e a honra de que moitos outros están connosco polo dereito de ter a súa propia Saga. Só queremos facer grandes xogos.”

«The Banner Saga» acadou algo máis de 723.000 dólares na súa campaña de financiación en Kickstarter en abril de 2012, superando, con moito, o obxectivo inicial de 100.000 dólares. Para os que non o coñezades, o xogo é un RPG por turnos cunha ambientación viquinga.

Está dispoñible para descargar en Steam para Windows e Mac.

Novo vídeo de «Road Redemption»

Por: Martes, 14 de Xaneiro de 2014, 16:00 COMENTAR

road-redemption
Inspirado nos clásicos «Road Rash», «Road Redemption» conseguíu recadar máis de 173.000 dólares na súa campaña en Kickstarter en maio de 2013.

Para amosar os progresos na creación do xogo, Paul Fisch publicou este novo vídeo das primeiras etapas do desenvolvemento do xogo.

Este foi o vídeo publicado ao comezo da campaña en Kickstarter:

O lanzamento está previsto para agosto deste 2014.

broken-age
Neste novo xogo de aventuras, Wood porá a voz a Shay, un dos protagonistas.

Segundo confirmou Tim Schafer esta fin de semana, o actor Elijah Wood (@woodelijah), coñecido principalmente por interpretar a Frodo nos filmes da saga «O Señor dos Aneis», ven de unirse ao reparto de actores que porán a súa voz no novo proxecto do estudo Double Fine: o «Broken Age».

Recentemente tamén confirmaron o personaxe de Curtis, o leñador será interpretado polo actor Wil Wheaton (@wilw), coñecido por interpretar o papel de Wesley Crusher na serie «Star Trek: A nova xeración» ou máis recentemente interpretándose a si mesmo como o inimigo mortal do Dr. Sheldon Cooper na serie «The Big Bang Theory».

Para os que non coñezades este videoxogo, anteriormente coñecido baixo o nome «Double Fine Adventure», en marzo de 2012 conseguíu recadar algo máis de 3,3 millóns de dólares na súa campaña na web Kickstarter.com.

Máis información na páxina oficial.

amazon
Segundo certas fontes da compañía, o xigante Amazon podería estar a barallar a posibilidade de lanzar ao mercado unha videoconsola propia.

Nesta época na que moitas compañías se lanzan a vender consolas que empregan o sistema operativo Android, dende a compañía non querían quedarse atrás neste potencial mercado.

Pese a este auxe de videoconsolas Android, tamén hai que ter en conta que non todas acadan o éxito agardado, como o caso da Ouya, que aínda que a súa campaña en Kickstarter foi todo un éxito, agora apenas un 27% dos seus usuarios chegaron a mercar a versión completa dos xogos do seu, polo de agora, escaso catálogo.

Entre as datas de lanzamento, soa con especial forza o vindeiro “Black Friday” (29 de novembro), data na que nos Estados Unidos inauguran a tempada de compras do Nadal con grandes descontos.

motorgun
O creador do coñecido «Twisted Metal» e «God of War», David Jaffe ven de crear unha nova campaña na coñecida páxina Kickstarter.com para conseguir o financiamento do seu novo proxecto: MotorGun, un xogo de loita de coches para PC e Mac.

Ademáis de Jaffe, tamén traballarán no título o coñecido Zack Norman, creador do popular «Interstate ’76» e a xente do estudo Pixelbionic.

Ambientado nun futuro post-apocalíptico, os xogadores atoparanse con tres faccións loitando pola supremacía. Teremos que escoller a carón de que facción loitaremos para destruir ás outras dúas. Entre os modos de xogo dispoñibles estarán: “Convoy”, “Captura a bandeira” e “Salvaxe”. Cada victoria daranos experiencia e chatarra coa que poderemos mellorar e personalizar o noso vehículo. Segundo afirman os seus creadores, co profundo nivel de personalización dos vehículos, cada coche será único.

A falta de 30 días para o remate da campaña e no momento de escribir este artigo, 308 persoas apoiaron o proxecto con 28,785 dos 650.000 dólares que precisa a campaña para seguir adiante.

ouya
Julie Uhrman, directora de Ouya, pedíu hoxe desculpas públicamente e por correo electrónico a todos os usuarios que o pasado agosto apostaron pola innovadora idea na campaña en Kickstarter, pero que, a día de hoxe, data na que se pon á venda nas tendas, aínda non recibiron nos seus fogares a consola.

Estou anoxada. Algúns de vós aínda non recibistes a vosa OUYA e pídovos perdón. Non prometín enviala á maioría de vós antes de que chegase ás tendas. Prometín enviárvolas a todos vós. Estiven a ler os vosos comentarios e estamos a traballar para solucionalo.

Aquí está o que eu sei:

Enviamos as vosas OUYAs ao noso servizo de envíos en maio e, dende entón, estiveron baixo a súa custodia. Pagamos o envío, pero as entregas seguen incompletas. Sabemos que todo o mundo recibirá a súa OUYA, pero está a levar máis tempo do agardado.

Estamos a traballar moi duro para que teñades as vosas respostas e, o máis importante, solucionar isto. Pola nosa parte, triplicamos o equipo de atención ao cliente para responder tan rápido como nos sexa posible ás vosas preguntas (pensade que a resposta pode ser que xa está en camiño). Estamos traballando coa empresa de reparto para resolver calquera problema administrativo relacionado coas consolas non entregadas (erros nos enderezos, impostos de alfándega, etc.). Polo que sabemos, a pesar dos nosos maiores esforzos, pode levar outras dúas semanas ou máis terminar as entregas desas unidades.

Resolverémolo o máis cedo posible. Tiven ao meu equipo traballando toda a noite para coñecer persoalmente cal era a situación real e que facer para solucionalo.

Hoxe mesmo, 25 de xuño, chegou ás tendas dos Estados Unidos e Reino Unido a videoconsola a un prezo de 99,99 dólares, aínda que nalgunhas tendas como Amazon aparece “temporalmente sen stock”.

ouya

Segundo parece, hai varios grupos de desenroladores traballando nunha aplicación que permita á videoconsola Ouya emular videoxogos tanto da NES como da SNES. Se ben os emuladores están na liña da ilegalidade, son unha popular alternativa para poder xogar a videoxogos antigos que son difíciles de conseguir.

A Ouya saltou á fama o verán pasado cando as súa campaña na páxina Kickstarter recadou algo máis de 8,5 millóns de dólares para a súa financiación. Aqueles usuarios que axudaron nesa campaña comezarán a recibir as consolas en breve, tal e como anunciou a compañía e como vos informamos anteriormente. Para os que chegáchedes tarde á campaña de financiación e estades interesados en adquirir unha, non vos preocupedes, pois está previsto que esté no mercado a partir do vindeiro xuño por uns 99$.

Data de envío da videoconsola Ouya

Por: Venres, 1 de Marzo de 2013, 11:00 COMENTAR

ouya
Despois do enorme éxito na súa campaña na web de crowdfunding Kickstarter, onde recadaron unha cifra superior aos 8 millóns e medio de dólares (nun principio, este proxecto precisaba soamente 950.000 dólares) o pasado verán (como xa vos falaramos neste artigo), os creadores do proxecto anunciaron que a partir do vindeiro 28 de marzo comezará a distribución das videoconsolas a toda a xente que axudou no proxecto contribuíndo cunha cantidade igual ou superior aos 99 dólares esixidos para esta recompensa.

Para os que non puidestes contribuír durante o verán pasado, non vos preocupedes: se estades interesados en adquirir unha unidade, terédela dispoñible a partir de xuño, por uns 100 $.

Máis información na páxina oficial