Gamelab Barcelona 2013

Por: Martes, 25 de Xuño de 2013, 11:00 COMENTAR

gamelab2013

Non é o E3 de Los Ángeles mais está moito máis preto, a edición do Gamelab de Barcelona deste ano, xa a novena, desevolverase durante esta semana, e nela darase cita o máis importante da industria do sector dos videoxogos e do ocio dixital, non so a nivel estatal, se non mesmo a nivel internacional, xa que o evento pasa por ser un dos máis importantes de Europa no seu ámbito. Durante tres días o público poderá asistir a conferencias, mesas redondas e talleres, sendo os conferenciantes estrela desta edición xente coma Michel Ancel (creador de Rayman), ou Matias Myllyrinne (director de estudio de Remedy Entertainment, os creadores de Max Payne e Alan Wake) entre outros.

GoW en gamelab

Público asistente nunha edición anterior do Gamelab

Mais é portas adentro, nas sesións de networking entre profesionais, onde teñen lugar os encontros que dan sentido a este tipo de eventos. Se para o siareiro dos videoxogos a atención está centrada en probar determinado xogo novo, conseguir mercadotecnia exclusiva ou escoitar a algún dos seus ídolos creativos, para as empresas e os profesionais do sector trátase, case simplemente, de negocios. E é que non podemos esquecer que o noso hobby preferido move máis cartos que o cine e a música xuntos.

Como evento paralelo á feira fallaranse os premios da Academia Española de las Artes y las Ciencias Interactivas, na súa sexta edición, onde se se repasa a lista de finalistas e nominados, chégase a conclusión da importacia crecente que os xogos para dispositivos móbiles veñen collendo nos últimos anos, especialmente entre desenvolvedoras con orzamentos limitados. Nesta ocasión o premio de honra recaerá no visionario deseñador Will Wright, pai dos hipercoñecidos Sims. Na anterior edición este premio foralle outorgado a Kazunori Yamauchi, o creador do exitoso xogo de coches Gran Turismo.

Así que se estes días ides estar pola cidade condal, non deixedes de pasarvos pola feira e contarnos logo as vosas impresións.

 

Red Dead Redemption, un xogo de cine

Por: Mércores, 19 de Xuño de 2013, 11:00 2 COMENTARIOS
red-dead-redemption

John Marston, o protagonista da historia, moi ao seu pesar

O cine e os videoxogos son dous xéneros que historicamente viaxaron xuntos compartindo título, alimentándose mutuamente cando o destino común foi bo e parasitándose cando un dos dous productos non chega ao nivel de calidade esixido ou agardado. Exemplos desto último temos nos dous sentidos: desde o fracaso da adaptación a primeiros dos 80 para Atari 2600 de “E.T. o Extraterrestre”, famosa por ser a presunta protagonista do curioso episodio de soterramento de xogos no deserto de Nuevo México, ata no sentido inverso, as pouco afortunadas versións cinematográficas de xogos de éxito, coma Doom ou Street Figther.

red-dead-redemption-screensaver-10

A xente non esquece, nada queda impune

Mais é un título da actual xeración, o que lle da unha volta máis ao exposto nesta introducción, o Red Dead Redemption, analizado no seu día nesta nosa páxina. O guión da obrigada redención do protagonista Jonh Marston ben podía provir dun filme clásico do western, xa de por si o xénero máis cinematográfico. Porén, neste caso, é o propio xogo de Rockstar Games, máis ben a súa historia, ambientación e fascinante factura en multitude de aspectos, o que se adentra no mundo da sétima arte, e faino dun xeito, ou duns xeitos, moi orixinais. Na propia promoción do xogo, a canle estadounidense Fox estreou en exclusiva unha curtometraxe de trinta minutos dirixida por John Hillcoat (The Road, 2009), e producida pola propia Rockstar Games, na cal, montando imaxes do propio xogo, o director plasmaba a súa visión persoal sobre un dos episodios que acontecen durante o desenvolvemento da historia:

 

Xa a nivel usuario, outros xogadores montaron videos coas imaxes do xogo, pero onde realmente se ve o valor cinematográfico da historia, é nos videos de productoras independentes coma Silk Dog Films, onde son actores reais aos que vemos beber, cazar, disparar, roubar ou simplemente tratar de sobrevivir nos inhóspitos paraxes de New Austin, Nuevo Paraiso e West Elizabeth:

 

Mesmo hai quen se atreve a ir un paso máis aló e realiza unha atrevida mistura de xogos que en principio non terían nada que ver, coma a que vemos nesta curta:

 

E se fora pouco o carácter cinéfilo do Red Dead Redemption, a última escena da anterior curta enlazanos directamente, con outra das maravillas desta historia: o Red Dead Redemption Undead Nightmare, unha praga zombi, das de sempre, seguindo a estela iniciada polo modo zombi do Call of Duty World at War, pero desta vez na fronteira norteamericana de primeiros de século XX:

 

Como complemento desta simbiose entre xogos e cine nesta xeración, apunto outras dúas senlleiras interaccións: o Alan Wake e Bright Falls (a súa serie precuela con actores reais coma ferramenta de promoción e introducción no argumento), e a enorme coincidencia de argumentos e ambientación entre o xogo L.A. Noire e a película Gangster Squad (Brigada de Élite).