Fai uns días que circula pola rede un documento da compañía Microsoft cos plans de futuro da plataforma Xbox.

Análizanse as limitacións da Xbox 360 e futuras amenazas.

O documento data de agosto de 2010 e conta con 56 páxinas nas que analizan a estratexia comercial ata o ano 2015. Comeza coa pregunta: “Por qué necesitamos unha nova Xbox en 2013?”. Pois ben, auguran que o mercado da Xbox 360 terá un declive na súa rentebilidade en 2013, sobre todo, pola aparición das consolas de nova xeración por parte de Nintendo (Wii U) e Sony (PS4), así como outros produtos como Apple TV e Google TV. Outro dos motivos sería a desactualización do seu limitado hardware, que non ten soporte para certas tecnoloxías actuais, como discos BluRay e 3D nativo, entre outras cousas.

A nova Xbox non será só unha videoconsola. Será un centro de entretemento completo.

Coa seguinte xeración, Microsoft pretende non só vendernos unha consola, senón un centro de entretemento completo onde poder xogar, ver a televisión, BluRay e experiencias online. Outro punto trata dunha actualización do Kinect, que fará que aumente a súa precisión, así como un aumento no número de xogadores de 2 a 4 persoas á vez. A maiores, tamén se fala dunha completa integración da Xbox 720 con outros dispositivos como PC, móbil e tablet.

O punto máis ambicioso pode chegar en 2015, cando a compañía de Redmond ten pensado que todo o contido sexa ofrecido dende a “nube Xbox”. A xente que posúa a consola, podería acceder sen ningún problema, pero quen non a teña, podería acceder cun dispositivo denominado “micro-consola”, co mínimo necesario para conectarse e recibir os contidos da nube Xbox. Coa estratexia de “todo na nube” pretenderían atallar dous dos grandes “problemas” da industria dos videoxogos: a piratería e o mercado de segunda man.

Para 2015 queren que todo o contido esté na nube.

Dende Microsoft están tratando de evitar a difusión deste documento pola rede, requerindo a diversos sitios a eliminación do mesmo ou o bloqueo da súa descarga. Agora ben, a filtración podería ser máis ben unha estratexia publicitaria. Cada un que pense o que prefira…

Se queredes ler o documento completo podedes descargalo aquí.