Nesta altura todos sabemos que os xogos teñen unha serie de pictogramas na súa capa que nos indican máis ou menos de que trata, se é violento, se usa palabras malsoantes, drogas, etc. Este é o método que se emprega para que os consumidores mal informados saiban o que van adquirir.

Así pois, a Conferencia de Consumidores Usuarios (CECU) e HIPACOOP realizaron un estudo para averiguar o nivel de coñecemento que ten a poboación a respecto dos pictogramas informativos de todo tipo de bens de consumos. E foi o sistema empregado nos videoxogos, o PEGI, o que peores resultados obtivo.

Deste xeito, o resultado das entrevistas a máis de dúas mil persoas foi verdadeiramente sorprendente. Menos de unha de cada dez persoas soubo identificar o pictograma do medo (unha araña nun fondo negro) e apenas 1% foi quen de identificar correctamente o símbolo da linguaxe obscena, mentres que 80% non tiña nin maldita idea do que significaba ese globo de cómic con signos dentro.

Ante estes pésimos resultados, CECU e HISPACOOP decidiron editar e distribuír quince mil guías informativas para que o consumidor teña algo máis claro todos estes pictogramas, e a estas dúas mil persoas boa falta lle fan.

A propósito, cantas destas máis de dúas mil persoas son das que pensan que os xogos violentos están a acabar coa sociedade, virando psicópatas os rapaces… se despois non son quen de diferenciar un produto con temática violenta doutros de temática social! Aconteceralles o mesmo cando vaian comprar un filme?

Sobre o autor:

@Skaltum | Ver as entradas publicadas por Skaltum »

«A NES mudoume a vida. Descubrín sagas que motivarían a miña existencia e xogos que modificarían a miña forma de pensar. Pouco despois chegou a Game Boy e somerxeume aínda máis neste mundo do que xa non fun capaz de saír. Cantos adxectivos existen para describir unha boa experiencia cos videoxogos? Innumerábeis. Pero sei que uns cantos píxeles mudaron a miña personalidade. Só vos podo dar un consello: Cando poidades tomade un bo caldo de píxeles.»

1 Comentario a “Case todos descoñecen o significado das imaxes do código PEGI”

  1. An di:

    A min parécenme obvios…pero cada tolo co seu tema. Apertas

Deixar un comentario