Xbox One 1
Pouco despois do seu lanzamento o pasado 22 de novembro, moitos usuarios queixábanse de que nas súas consolas non funcionaban os xogos en formato disco.

Para arranxar o problema, Microsoft enviaralle unha nova consola aos usuarios e, para mellorar o tempo de espera, poderán descargar de balde na consola defectuosa unha copia dixital dun xogo, entre os que se inclúen: Dead Rising 3, Forza Motorsport 5, Ryse: Son of Rome e Zoo Tycoon.

“Mentres enviamos a nova consola, queremonos asegurar de que os nosos usuarios poidan seguir xogando.”

“Imos ofrecerlle a cada un deles unha descarga dixital gratuíta dun dos títulos de lanzamento publicado por Microsoft Studios.”

battlefield 4 1
Para compensar aos xogadores polos problemas iniciais de conexión, DICE anunciou unha semana enteira na que os xogadores recibirán o dobre de experiencia. Así, dende o vindeiro 28 de novembro e ata o 5 de decembro poderedes aproveitar para mellorar o nivel do voso personaxe multixogador.

Dende o seu lanzamento, Battlefield 4 tivo moitos problemas, como inestabilidade dos servidores, partidas gardadas corruptas, perda de experiencia e caídas do xogo, como admitíu o xefe de DICE, Karl Magnus Troedsson:

“O xogo experimentou algunhas turbulencias no seu lanzamento. Mentres que algunhas plataformas soamente tiveron problemas menores, outras tiveron moitos máis problemas.”

“Resolver os problemas de lanzamento é a nosa prioridade número 1. De feito, para nós é tan serio que temos a todo o equipo traballando para estabilizar o xogo e non nos poremos a traballar noutros proxectos ata que esteamos seguros de que Battlefield 4 cumpre – e excece – as vosas expectativas.”

A maiores, o último día, 5 de decembro, os xogadores tamén recibirán como agasallo un arma especial:

“O 5 de decembro darémoslle a todos os xogadores que inicien sesión no modo multixogador de Battlefield 4 unha pistola M1911. Esta arma especial, que estaba reservada para os nosos desenvolvedores de DICE, conta cun zoom de 3 aumentos e está dispoñible para todos os rangos en Battlefield 4.”

Hoxe ás 22:00 sairá a Xbox One

Por: Xoves, 21 de Novembro de 2013, 14:51 COMENTAR

xbox one disco duro

O nova xeración xa está, xa é unha realidade, porque a consola de Microsoft está previsto que saia mañá, 22 de novembro.

Pero como vos queda a cara se vos digo que o momento de lanzamento de Xbox One se adianta unhas horas?

Así o farán diversas empresas dedicadas a este mundo como GAME ou Gamestop, que hoxe mesmo a partires das 22:00 terán a súa consola a disposición de todos os usuarios.

Así que se non tedes pacencia para agardar até mañá xa sabedes, tedes unha opción para ser os primeiros en entrar na “next gen”.

Tomb Raider tamén chegará á Xbox One e PS4

Por: Mércores, 20 de Novembro de 2013, 18:05 COMENTAR

tomb raider 2

O xenial videoxogo Tomb Raider, non vos perdades a análise que fixemos meses atrás, chegará tamén ás consolas de nova xeración.

Todo comezou un rumor, mais este chegou a facerse realidade, despois de que Square Enix afirmase que esta nova entrega chegará á Xbox One e PS4 este mesmo 7 de decembro.

Isto baixo o nome de Definitive Edition, é dicir, con todos os DLCs e descargas que foron saíndo.

E aínda que do prezo aínda non dixeron nada, Amazon Italia arriscouse a poñelo a 59.99€.

Serei honesto, non me gusta nadiña que a nova xeración comece a valerse de “ports” de consolas anteriores, porque ben vimos o que aconteceu nesta xeración cando comezaron a sacar “ports” en HD da PS2, que nun breve período de tempo estabamos inundados destas reedicións.

Espero que quede nun caso illado e que nesta nova xeración que entre nos sorprendan con novas propostas e que non se alimenten do xa feito.

thief_2013_sigilo

Os Quick Time Events seguen encantando a uns (parece que cada vez menos) e sendo odiados por outros, e despois de que os fans criticasen a inclusión destes na próxima entrega de Thief, os seus responsábeis decidiron eliminalos completamente.

Na demostración do xogo do E3 dunha hora de duración só había un QTE. Porén, debido ás fortes reaccións que se produciron entre a prensa especializada e a comunidade de usuarios, foi decisión fácil acabar con eles comlpetamente.

Este novo título chegará ao longo do 2014 para PC, PS4 e Xbox One.

Tráiler da historia de Dead Rising 3

Por: Luns, 11 de Novembro de 2013, 15:42 COMENTAR

dead-rising-3

Son eu ou o salto gráfico con respecto da próxima xeración non é tan importante como están a dicir. Polo de momento non me pareceu que ningún título dos que amosaron rechamase tanto, e agora, que nos chega o tráiler de Dead Rising 3, non vexo moita diferenza (ou ningunha) entre a Xbox 360 e Xbox One.

Obviamente falo deste tráiler que parece que non apostará pola calidade gráfica, e si polo número de personaxes en pantalla.

Dádelle a play e compartide a vosa opinión, porque a ver se vai ser cousa miña todo isto…

Xbox One, enviada antes de tempo

Por: Luns, 11 de Novembro de 2013, 11:00 COMENTAR

xbox one disco duro
Polo menos dous usuarios da tenda Target xa recibiron nas súas casas a nova videoconsola de Microsoft e fálase de que esta cifra podería chegar aos 100 casos.

Un dos usuarios decidíu subir un vídeo a YouTube desempaquetando a videoconsola e amosando o contido da caixa. Aínda que o vídeo foi eliminado nun primeiro momento por unha reclamación da propia Microsoft, volveu a subilo e, polo de agora segue a estar dispoñible. Aquí o tedes:

Pese a obter a consola lexítimamente, a consola foi expulsada dos sistemas en liña de Microsoft, aínda que dende a compañía xa se apuraron a afirmar que “fose o que fose o que pasou, non será permanente. Podo afirmalo cun 100% de seguridade”, tal e como comentou o propio Larry Hryb.

Segundo este usuario, a primeira descarga obrigatoria ocupa uns 500 MB e xa hai dispoñibles varios xogos na tenda dixital, como o Call of Duty: Ghosts ou o Lococycle.

O outro usuario, nada máis recibila, decidíu subastala en eBay, cun prezo de saída de 999 dólares (uns 783 Euros), pero chegou a acadar os 10.000 dólares (uns 7.840 Euros) antes de ser cancelada por petición da propia compañía.

Dende a cadea de tendas Target comentaron que esas consolas foron enviadas antes de tempo por un erro do sistema e que a cifra podería chegar ás 150 consolas, mais afirman que non foi un envío masivo.

Nun comunicado oficial, Microsoft afirmou que restrinxirá o acceso aos servizos en liña a todas as videoconsolas que se conecten antes do día de lanzamento oficial. Suponse que ese bloqueo será levantado o mesmo día de lanzamento, mais cos de Redmond, calquera sabe…

fm5
Nunha recente entrevista, o diretor creativo do estudo Turn 10, Dan Greenawalt confirmou que a nova entrega da saga Forza Motorsport soamente contará con 200 coches e 14 circuítos. Estas cifras chaman aínda máis a atención se botamos a vista atrás e vemos que a entrega anterior contaba con 500 coches e 26 circuítos.

Entre as baixas nos trazados, cabe destacar a ausencia de circuítos como Suzuka, Infineon Raceway ou o “Inferno verde” de Nürburgring.

“Algúns dos circuítos precisaban ser actualizalos. Algúns había que actualizar a iluminación e outros requerían unha grande actualización. Silverstone, por exemplo, foi totalmente recapturado. Varias das nosas pistas estaban mal, ben porque foron mal capturadas e a tecnoloxía mellorou ou ben porque a pista cambiou, como no caso de Silverstone.”

“Graduamos os circuítos segundo o estado no que están e, se non cumpren os requisitos, sacámolos fóra. Para min, non foi tanto de se quero incluír éste ou aquel. Quixen dar a calidade da nova xeración e iso significa ter os shaders e imperfeccións do formigón. A maneira máis sinxela de ter iso é escanear con láser todo o circuíto, xa que captura todas esas imperfeccións. Tiñamos referencias antigas dos circuítos onde, se as pistas estaban preto, puidemos volver a esa antiga referencia e recrear esa imperfección. Por definición, iso significa que esas pistas levan máis tempo de traballo que ata o de agora.”

“Estamos vendo de escanear con laser os circuítos, que é ao que se reduce todo agora mesmo. Queremos que sexa un estándar para a vindeira xeración. O noso obxectivo non é traer contido antigo e, mesmo cos coches, fixemos o mesmo proceso. Había algunhas incorreccións e algúns coches tiñan especificacións anticuadas e tivemos que actualizadas do Forza 2 ao 3 e ao 4. Pero non tiñan o número de polígonos que queríamos e non era tan sinxelo como aumentar a resolución, así que simplemente os capturamos de novo. Algúns deles, tiñan as especificacións ben e puidemos engadir polígonos onde os precisabamos. Por iso chegamos a este sistema de calificación e calquer circuíto ou coche que non tivese unha calificación sobresaínte foi quitado ou recapturado.”

silverstone

Aínda hai esperanzas de que eses trazados volvan ao xogo. De feito hai rumores de que están a traballar no circuíto de Nürburgring e que podería chegar a comezos do ano que ven, mais dende Turn 10 non se comprometen a nada:

“Estamos a ver que incluímos como DLC. Evidentemente, estamos centrados nos coches, que é algo que facemos ben. Estamos a pensar nos circuítos tamén, así que veremos que podemos facer.”

Entre os novos circuítos incluídos no novo Forza, cabe destacar Spa-Francorchamps, sede do GP de Fórmula 1 de Bélxica e o australiano de Bathurst’s Mount Panorama, coa súa coñecida sección de montaña.

Se ben o número de coches é moito menos, dende o estudo destacan a súa diversidade, incluíndo por primeira vez na saga monoprazas coas rodas descubertas, como o Dallara DW12, empregado nas Indycar Series e dous F1 clásicos, como son o Ferrari 312T e o McLaren M23, ambos do ano 1976. Nun novo anuncio sorprendente no tráiler de lanzamento (que podedes ver máis abaixo), tamén incluirán o monopraza que na tempada actual pilotan Kimi Räikkönen e Romain Grosjean, o Lotus E21.

ferrari-312T

Outros dos atractivos son dous dos últimos superdeportivos en chegar ao mercado, o McLaren P1 e o híbrido Ferrari LaFerrari, aínda que éste último chegará nun dos primeiros DLC’s de pago. Respecto a isto, Greenawalt comentou:

“A cousa con estes superdeportivos é que se traballou neles moi tarde.”

“Incluso co P1, que tivemos no stand do E3, pero cambiou dende entón. Engadiron máis proteccións baixo os escapes e modificaron a malla da parte traseira. Unha cousa é facer un Focus, que cando está feito, está feito e Ford vai fabricalo en masa, pero cando falas dun coche do que únicamente se van facer 300 unidades, poden cambialo en calquer momento.”

Sobre a decisión de incluír o LaFerrari nun DLC, comentou:

“Vimos que o xogo ten algo máis de 200 coches e todos teñen este nivel de detalle cunha enorme variedade. Para nós foi un enorme éxito ter os DLC’s de pago. Aqueles que non o queren, non teñen porqué telo e aqueles que o queren, poden mercalo. O pase de tempada permite mercalos todos cunha subscrición.”

Falando do tema dos novos superdeportivos, bótase de menos o Porsche 918 e dende o estudo non se pronunciaron ao respecto se foi un problema de licenzas (como xa pasou no Forza 4, se ben, todos sabemos que ao final acabaron incluíndoos nun DLC, de pago, evidentemente…).

O pase de tempada do Forza 5 custará 49,99 € e, como na entrega anterior, incluirá 6 DLC’s con 10 coches cada un e serán publicados mensualmente dende o vindeiro xaneiro ata xuño.

“A resposta foi boa. Iso non quere dicir que todo o mundo esté contento. A xente estivo mercándoo e despois xogando.”

call-of-duty-ghosts
Tal e como confirmou Mark Rubin (@IWMarkRubin), produtor executivo de Infinity Ward, a versión para a Xbox One terá unha resolución nativa inferior á súa principal competidora, a PlayStation 4, que ofrecerá unha resolución FullHD de 1920 x 1080 píxels.

Se ben na consola de Microsoft tamén pode ofrecer esa resolución, pero segundo comentou o propio Mark, sería mediante un reescalado dende os 1280 x 720 píxels nativos cos que funcionará na Xbox One. En ámbalas dúas videoconsolas funcionarán a 60 FPS.

Esta nova chega pouco despois de que se confirmara que no principal rival deste xogo, o Battlefield 4 tamén terá unha resolución inferior na consola de Microsoft (1600 x 900 na PlayStation 4 fronte aos 1280 x 720 da Xbox One).

Mala publicidade ésta para a xa pouco popular Xbox One

dead-rising-3
Capcom anunciou que Dead Rising 3 contará cun “Pase de tempada” por 29,99 € que ofrecerá aos xogadores un desconto do 25% nos catro DLC’s previstos polo de agora, que custarán 9,99 € cada un.

Segundo os plans da compañía, o primeiro DLC chegará en decembro, baixo o título “Operation Broken Eagle’, mentres que os outros tres, “Fallen Angel”, “Chaos Rising” e “The Last Agent”, chegarán en 2014.

Aproveitando a coñecida festividade de Halloween (que terá lugar esta mesma noite), a compañía nipona non perdeu a ocasión de amosarnos, co particular humor da saga, como podería ser esta celebración dentro do xogo.

O lanzamento está previsto para o 22 de novembro en exclusiva para Xbox One agás no mercado alemán, ao non superar as probas de calificación de idade do organismo encargado no país.

witcher3
A compañía Namco Bandai será a encargada da distribución no continente europeo do novo RPG «The Witcher 3: Wild Hunt», segundo confirmou a propia compañía.

Adam Badowski, do estudo CD Projekt RED, comentou:

“Xa traballamos con Namco Bandai anteriormente, polo que os nosos socios xa coñecen The Witcher e os ideais que temos como estudio.”

“Estamos convencidos de que entenden a nosa visión do xogo e que farán un gran traballo para que os usuarios coñezan como o mundo aberto e a gran historia do xogo farán cambiar o panorama dos RPG na vindeira xeración.”

«The Witcher 3: Wild Hunt» foi anunciado o pasado febreiro e empregarán o novo motor gráfico do estudo, o RedEngine 3. Estará dispoñible para PC, PlayStation 4 e Xbox One. Segundo o propio estudo, o mundo de The Witcher 3 será trinta veces máis grande que o do seu predecesor.

ryse_sons_of_rome-006
Microsoft publicou dous novos vídeos de «Ryse: Son of Rome».

O primeiro é o anuncio para televisión e céntrase na historia do protagonista do xogo, Marius Titus. O segundo vídeo é un breve documental centrado na creación das armas e armaduras do xogo.

«Ryse: Son of Rome» é un dos 23 títulos de lanzamento da Xbox One.